Bjerkrheim-kantaten på 15 stader
09.06, anno domini 2010 Kantaten Det strøymer ei livselv av lukke, som inneheld 17 av Trygve Bjerkrheim sine songar og dikt, er nå framført på 15 stader, av Jæren Kammerkor under sin dirigent Ingunn Bjorland.
Fyrste helga i juni var turen komen til Lyngdal fredag, Kristiansand og Mandal laurdag og i Salem, Stavanger, sundag kveld. ”Konkurransen” dei hadde sundag var at Whitney Houston song for ca 13.000 i den nye skøytehallen Sørmarka Arena i Stavanger. Ho fekk terningkast 3 i Stavanger Aftenblad, men dei som var i Salem og fekk oppleva Jæren Kammerkor og Lage Wedin, ga ”trampeklapp” som kunne tyda på terningkast 6!
Som solist var også denne gongen med svensken Lage Wedin, som var han som gjorde songen Det er makt i de foldede hender landskjent då han som 17 åring, for snart 50 år sidan, song den inn på plate. Og det er ein av dei mest spelte songane i NRK Ønskekonserten si historie.
Det er Hans Kristoffer Goa, tidlegare formann i TBV, som har skrive mellomtekstane til kantaten, og han er også med som tekstformidlar. – Det er Sigvald Tveit som har komponert og arrangert kantaten for blanda kor.
Biletet er frå den gongen Lage Wedin (t.v.) vart heidra som æresmedlem i Trygve Bjerkrheims Venner.